"Tur Skritura ta inspirá pa Dios i ta útil pa siñansa, pa reprendementu, pa korekshon, pa eduká den hustisia, pa e hende di Dios por ta perfekto, ekipá pa tur bon obra.'" 2 Timoteo 3:16,17

Bon bini na Changing Life Ministries Bible Education Center (CLM-BEC). CLM-BEC ta ofrese estudionan di Beibel na un manera simpel i komprendibel. E meta ta pa amplia bo konosementu mas i mas pa medio di studia e Palabra di Dios na un manera personal i uniko. E plan di Dios pa kada un di nos ta pa nos krese den konosementu, studiando e Palabra di Dios. 2 Timoteo 3:16 i 17 ta afirmá ku e Skritura (Beibel, Palabra di Dios) ta e base pa nos forma nos prinsipionan i pa nos ta hendenan ku Señor por usa pa impaktá e mundu aki.

E estudionan ta konsistí di e siguiente Modulónan:

Modulo basikó:
Edukashon elementario tokante diferente terminologianan fundamental Bibliko.
Lo trata terminologianan manera Beibel, Salbashon, Dios, Iglesia, Alabansa, finansa i hopi mas. Tambe lo trata algun prinsipionan pa siña, anima i enkurasha e studiante pa ta un disipulo di Señor Kristu Hesus.

Modulo intermediario:
Edukashon tokante diferente terminologianan Bibliko ku lo proveé amplio konosementu Bibliko. Lo trata terminologianan manera Historia di Beibel i Kristianismo,Tempel di Salomon, Geografia Bibliko, Religionan i hopi mas.

Modulo avansa:
Edukashon Bibliko avansa ku e meta pa prepará i forma kada studiante pa ser lidernan kapasitá pa usa nan donan i talentonan ku Dios a duna nan pa siña otronan, koregí otronan, i eduká otronan. Lo trata terminologianan manera Disipulado, "Deskubri bo don i talento", Teologia, Konseheria, Angelogia, Antropologia, Liderasgo i hopi mas.

Modulo Ministerial:
Edukashon ku e meta pa kapasitá e studiante pa ta e hende di Dios perfekto i ekipá pa tur bon obra (Ministro di Dios). Lo trata terminologianan manera "5 fold Ministry", Homeletika, Hermaneutika, Konseheria Pastoral, Patriarkanan, Evangelisashon i hopi mas. Por ultimo e studiante lo tin oportunidat pa traha i presenta tesisnan, i efektua diferente eksamenan theoretiko i praktiko pa risibi un sertifikado/Diploma Ministerial.

E lèsnan ta kompletamente gratis. Solamente na final kada moduló e studiante tin ku duna un ofrenda di amor pa e sertifikado. Tambe nos ta habri pa risibí kualke ofrenda ku e studiante kier duna na e obra pa por sigi duna e lèsnan pornada na esnan ku tin mester di dje. CLM-BEC no ta un iglesia sino un centro di edukashon. Nos ta konfia ku e estudionan aki lo duna bo konosementu tokante Dios, e Beibel i e bida Kristian i prepara bo pa un nivel mas haltu.

Nos ta spera i konfia Dios ku pronto nos por yama bo bon biní komo studiante di CLM Bible Education Center.

Pastor Stanley & Régine Leito
Instructor of Biblestudy