Dios tin tur kos bou di kontrol! Djis konfi’É.

"Bin serka Mi tur ku ta kansá i kargá, i lo Mi duna boso sosiegu. Tuma Mi yugo riba boso, i siña di Mi, pasobra Mi ta mansu i umilde di kurason; i boso lo haña sosiegu pa boso alma. Pasobra Mi yugo ta suave i Mi karga ta lihé." MATEO 11:28-30

Un tata tabata para kontemplando kon su yu homber chiki, tabata hasiendo esfuerso pa move un piedra. Despues di un ratu e tata a puntra e yu: “Bo ta usando tur bo forsa?”. E yu, tur kansá, a wak e tata i a kontesta “si tata, tur mi forsa mi ta usando”. “No mi yu, bo no ta usando tur bo forsa” e tata a kontesta! “Si tata, tur mi forsa mi ta usando” tabata e kontesta di e yu. “No mi yu, bo no ta usando tur bo forsa, pasobra bo no a pidimi yudabo, mi forsa huntu ku esun di bo, esei ta bo forsa.”

Tin hopi kos den nos bidanan ku nos no por kontrola. Maske kuantu nos purba, maske kuantu nos fòrsa, tog ta parse manera nos ta bai mas patras ku dilanti. Situashonan inkontrolabel ta bira un preokupashon i stres di tal manera ku nos ta bira intrankil i sin mira speransa mas.
Dios nos Tata, dor di Cristo Jesus, ke yuda nos den i dor di tur situashon. Djis pidi’E pa Su Forsa i Poder kompaña bo i lo bo mira resultadonan grandi den bo bida.

Mateo kapitulo 14 versikulo 13 te ku 21 ta duna nos bon indikashonnan, pa nos pone nos konfiansa den Jesus i konfia den Su abilidad Divino pa kontrola kosnan ku nos ta mirando ta sali for di man.

Promé ku tur kos bo mester sa ku bo ta importante pa Jesus. No pensa ku bo no ta nada, bo no ta sirbi, bo no por nada. Pasobra un bon notisia ku mi tin pa bo ta ku, pa Jesus si bo ta importante i bo tin hopi balor i e ta stima bo.
E kos di mas grandi di Dios ta ku no solamebte e ta stima bo, sino e ta sinti pa bo. E sa e luchanan ku bo ta pasando aden, E sa bo karganan, E sa bo difikultatnan i E lo bin na bo yudansa i sana bo.  Si bo ta malu di salú, Jesus lo kura bo, si bo finansas ta malu Jesus lo drech’é, kualke situashon difisil, djis bin serka Jesus, bis’E bo situashon, i E lo kura bo of sana bo. Jesus tabatin kompashon pa e hendenan ku a bin serka dj’E. Bin serka Jesus manera bo ta, i Jesus lo yudabo, salba bo, pordona bo i duna bo un bida nobo.

E disipelnan a bin serka Jesus ku un sugerensia, pa laga e hendenan bai pasobra ta birando lat i nan tin ku kome. Hopi biaha nos ta kana ku bista humano i logiko i e por yega asina lew ku na luga di nos pidi Jesus konseho, nos ke konseha Jesus, kiko E tin ku hasi. Na luga di sigi Jesus, nos ke pa Jesus sigi nos, na luga di kana segun Jesus Su pensamentunan nos ke pa Jesus kana segun nos pensamentunan. Pero Jesus sa bon kiko E ta hasiendo. Dios sa bon kiko e ta hasi den i dor di nos bidanan. Djis pone bo bida i bo situashon den man di Jesus i sigi Su konseho i Su gia, kual ta e Palabra di Dios. Jesus a kontesta e disipelnan, ku e hendenan no mester di bai. Dios no ta kore ku bo, Dios no ta despresia bo, Su Palabra ta siñanos den Juan 6:37,  “Tur loke e Tata dunami, lo bin serka mi, i esun ku bin serka mi, Mi no ta kore kun é.

Hopi kos nos mes ke kontrolá, hopi kos nos mes ke solushoná sin pidi Dios Su yudansa Cristo Jesus ta pidi pa nos entrega e tiki forsa ku nos tin na dj’E i e multiplika nos forsanan pa nos por sigi lucha dor di tur situashon difisil i duru. E 5 pan i 2 piska tabata e tiki ku nan tabatin, kual tabata parse manera ta nada, pero Jesus a bendishon’é i E la wòrdu multipliká i tur hende a risibi kuminda. Jesus a bisa den Mateo 11:28 “BIN SERKA MI TUR KU TA KANSA I KARGA, I LO MI DUNA BOSO DESKANSO”

Orashon: Señor, Bo palabra ta bisa pa mi pone tur mi karganan riba bo. Mi ta ponenan dilanti di Bo trono di grasia. Mi sa ku den mi mes forsa mi no por, pero den e forsa di Bo. Danki pa e pas ku ta surpasa tur tipo di entendimiento. Danki Señor ku mi por konfia den Bo pasobra Abo ta mi fòrti i mi refugio.

Pa pone den praktika riba e dia di awe: Kada biaha ku bo kuminsa preokupa, bisa Señor: Mi ta pone mi karga riba Bo i Abo ta dunami sosiegu.