Hagar: Un mama soltero !

Genesis 16

Den Beibel tin yen di historia ku ta refleha mas ku un pasado. Hopi kos ku a pasa ku e hòmbernan i e muhénan di Dios sea bon i malu ta presenta awendia den nos tempu. Si nos mira bon, te dia di awe nos ta haisendo e mesun erornan ku nos antepasado.

Kisas abo tambe ta manera Hagar den e estadistikanan di mama soltera di nos pais. Kisas bo ta bo so ta bringando i lantando bo yu sin kompania di un kasá. Kisas bo ta sinti bo bo so, sinti bo bandoná òf rechasá. Kisas bo ta mama soltera dor di erornan di pasado, desishonnan malu hasí i tin bes bo ta sinti bo abergonsá, kulpabel i ta wòrdu preshoná dor di amigunan i di famianan. Kisas bo a pasa den un prospeso di diborsio òf kisas bo esposo a fayesé. Kua ku ta e sirkustansia mi kier bisa bo ku "Dios ku ta mira" Dios EL-ROI Genesis 16:13. Esun ku ta kwida di bo. No preokupa bo, laga Dios okupá di e situashon.

Hopi di nos konosé e historia di Abram (Abraham), Sarai (Sara) i Hagar. Dios a duna Abram e promesa ku E su desendensia lo ta manera streanan. Genesis 15:5-6 Dor di warda hopi pa e promesa wòrdu kumplí, Sarai a perde pasenshi i a tuma desishon riba su mes. Sarai a disidí di yuda Dios dor di duna Abram e kria Hagar pa e drumi kuné asina nan por haña desendensia. Laga nos wak e sigiente versikulónan.

GEN 16:2 Asina Sarai a bisa Abram: "Awor mira, SEÑOR no a lagami haña yu. Pa fabor, drumi ku mi kriá; podisé lo mi haña yu pa medio di djé." I Abram a skucha bos di Sarai.
GEN 16:3 Anto despues ku Abram a biba dies aña na tera di Kanaan, Sarai, esposa di Abram, a tuma Hagar, su kriá egipsio, i a dun'é na su esposo Abram komo su esposa.
GEN 16:4 I Abram a drumi ku Hagar, i el a sali na estado; i ora ku el a mira ku el a sali na estado, su shon a keda despresiá den su bista.

Aki nos por mira kon Sarai a habri porta pa un desaster spiritual. Ora Hagar a sali na estado e la kuminsa mira Sarai ku despresio. Awor Hagar a hañé ta huí dor ku Sarai tabata hasi su bida imposibel.

Hagar a bira viktima di e eror kometé dor di Sarai i Abram. Pero Gloria na Dios ku Dios ta transforma e malu den bon.

GEN 16:7 Awor e Angel di SEÑOR a hañ'é banda di un fuente di awa den desierto, banda di e fuente na kaminda pa Shur.
GEN 16:8 I El a bisa: "Hagar, kriá di Sarai, di unda bo a bin i na unda bo ta bai?" I el a bisa: "Mi ta hui for di presensia di mi shon Sarai."
GEN 16:9 Anto e Angel di SEÑOR a bis'é: "Bai bèk serka bo shon, i someté bo mes na su outoridat."
GEN 16:10 Ademas, e Angel di SEÑOR a bis'é: "Lo Mi multipliká bo desendientenan masha hopi mes, asina ku nan lo ta muchu hopi pa konta."
GEN 16:11 E Angel di SEÑOR a sigui bis'é: "Mira, bo ta na estado, i lo bo haña un yu hòmber; i lo bo dun'é e nòmber Ismael, pasobra SEÑOR a tende bo aflikshon.

Dios a mira Hagar i su sufrimentu i asina Dios ta mira esun di bo. Ta pesei E ta Dios EL-ROI Dios ku ta mira! Dios a bisa Hagar pa duna e yu e nòmber di "Ismael". E nòmber Ismael ta nifiká: Dios ta tende i ta mirami. Ki bon Dios nos ta sirbi. Kual sea e motibo ku bo ta un mama soltera, no ta importa mas. Loke ta importante ku Dios ta tende i mira i ta bai hasi algu den bo situashon. Señor ta stima bo i E kier e miho pa bo.

Dios no a bandoná Hagar ni su yu Ismael den e situashon aki. Mira kon nunka Sarai a yama Hagar na su nòmber sino komo "kria", pero ora Dios a yega serka Hagar, E si a yamele na su nòmber. Dushi ta kon Dios ta yama nos na nos nòmber maske otro yama nos otro kos dor ku nos a faya.

Hagar un mama soltero, ku a sufri i ku a sa di obedesé Dios. Importante ta pa nos obedesé Dios i asina wòrdu bendishoná manera e muhé aki. Dios ta bisa bo awe: El a warda bo manera Su pret'i wowo. DEUTERONOMIO 32:10 i e ta skondebo bou di e sombra di Su halanan SALMO 17:8.

Dios ta stima bo i E kier yuda bo. Bo ta dispuesto pa dun'É un shens? No sinti bo bergonsá pasobra si bo konfesá bo pikanan na Dios, E ta fiel i hustu pa pordoná bo.

1 JUAN 1:9 Si nos konfesá nos pikánan, E ta fiel i hustu pa pordoná nos nos pikánan i pa limpia nos di tur inhustisia.

Orashon: Danki mi Señor i Salbador ku Bo ta un Dios ku ta pordoná i lubidá. Pordoná mi ku mi a faya i dor di mi fayonan a bin konsekuaenshanan ku mi tin ku karga. Siñami ta un muhé obedesido manera Hagar, ku a skucha na bo bos. Señor, Bo ta Dios EL-ROI, Dios ku ta mira. Mira mi stituashon i tende mi sklamor. Danki ku Bo ta kwida di mi i mi yu(nan). Mi ta warda riba bo pa un bon kasá. Un hòmber ku ta stima bo i tin temor pa Bo. Un hòmber ku sa di kwida di mi i mi yunan. Den e presioso nòmber di Bo Yu Cristo Jesus. Amen.