Laga tur kos atras i sigi Cristo!

Awor e obranan di karni ta evidente, kualnan ta: inmoralidat, impuresa, sensualidat,
idolatria, bruheria, hostilidat, bringamentu, yalursheit, rabiamentu, pleitamentu, desakuèrdo, doktrina falsu, envidia, buracheria, parandiamentu, i kosnan asin'aki, di kualnan mi ta spièrta boso di antemano, meskos ku mi a spièrta boso kaba di antemano, ku esnan ku praktiká sorto di kosnan asina lo no eredá e reino di Dios. GAL 5:19-21

Tristu pero bèrdat. E palabra di Dios ta mustranos ku e obranan di karni menshoná den Galationan ta hiba nos na destrukshon i nos lo no eredá e reino di Dios. Kisas abo no ta den inmoralidat, impuresa, sensualidat, idolatria etc. pero si kisas bo ta tuma parti den otro kosnan. Tin kosnan ku tin biaha nos ta kere no tin nada den esei. Por ehèmpel yalursheit, rabiamentu, pleitamentu i desakuerdo. Esakinan ta asina poderoso ku nan por destruí famia, matrimonio i hasta iglesia. Beibel ta siña nos hopi kaminda pa nos stima otro, pordoná otro. Pero ta parse ku nos komo yu di Dios no ta hasi kaso na e atvertensha di Dios. Mi no ta bisa ku e yalursheit, rabiamentu, pleitamentu i desakuerdo no ta presentá. E kosnan aki ta bini den nos kaminda ku nos ke òf no. Nos ta haña nos ku nan. Ta pesei beibel ta alerta nos i hopi kaminda e ta bisa nos kiko pa hasi. Nos tin e fruta di Spiritu Santu pa nos aplika. I den e fruta aki ta inkluí dominio propio. Dominio propio ta algu hopi importante den nos bida. Tur dia di nobo nos tin ku praktiké. Den kualke situashon ku presentá den nos kaminda.

Den Efesionan 4:22-29 tambe Señor ta bisa: pa, enkuanto boso manera di biba di antes, boso pone un banda e hende bieu ku ta wòrdu korumpí konforme e pashonnan engañoso, i pa boso wòrdu renobá den e spiritu di boso mente, i pa boso bisti e hende nobo, ku a wòrdu kreá segun Dios den hustisia i santidat bèrdadero. Pesei, poniendo mentira un banda, kada un di boso papia bèrdat ku su próhimo, pasobra nos ta miembro di otro. Rabia, ma no hasi piká; no laga solo baha riba boso rabia, i no duna diabel oportunidat. Laga esun ku ta hòrta, no hòrta mas; ma mas bien, lagu'é traha, hasiendo ku su mes mannan loke ta bon, pa e por tin algu pa kompartí ku esun ku ta den nesesidat. No laga ningun palabra dañino sali for di boso boka, sino solamente palabra ku ta bon pa edifikashon, konforme e nesesidat di e momento, pa esaki por duna grasia na esnan ku ta tende.

Ki difísil ta pa no laga ningun palabra dañino sali for di nos boka. Sea nos ta papia malu, hasi redu òf tende redu. Nos ta forma partí di loke Dios ta aboresé. Laga nos ban kambia i praktika loke Dios ta bisa nos pa nos hasi. Stop di papia malu ku hende òf papia malu di hende. Laga nos stop ku envidia, yalursheit, rabiamentu, pleitamentu i desakuerdo.

Orashon: Señor Dios, primeramente pordoná mi ku mi a papia malu ku mi rumannan òf papia riba mi rumannan den Cristo, yudami praktiká dominio propio. Mi sa ku esaki a bin den e pakete di e fruta di Spiritu Santu. Siñami kana manera bo kier pa mi kana. Pone bo grasia riba mi i awor mi kier papia ku Bo Señor di mi rumannan, presentado Bo nan problemanan. Siñami di ta un muhé di interseshon, kaminda mi ta bin dilanti di Bo trono intersediendo pa mi rumannan. Den nòmber di Cristo Jesus.

 Pa bo medita riba dj'é: Ma fruta di e Spiritu ta amor, goso, pas, pasenshi, kariño, bondat, fieldat, mansedumbre, dominio propio; kontra kosnan asina no tin lei. Awor esnan ku ta pertenesé na Cristo Jesus a krusifiká e karni ku su pashonnan i deseonan. Si nos ta biba segun e Spiritu, laga nos kana tambe segun e Spiritu. No laga nos bira hende gabadó, probokando otro, kudishando otro. GAL 5:22-26