En-Hakore

 

Tumamentu di desishon

"Mira, awe mi a pone bo dilanti bida i prosperidat, morto i atversidat, dor ku mi ta ordenábo awe pa stima SEÑOR bo Dios, pa kana den Su kamindanan i pa warda Su mandamentunan, Su statutonan i Su huisionan, pa bo biba i multipliká, i pa SEÑOR bo Dios bendishonábo na e tera ku bo ta bai drenta pa poderá di djé."Ma si bo kurason desviá i bo no ta obedesé, ma ta wòrdu halá for di e kaminda i ta adorá otro diosnan i ta sirbi nan, mi ta deklará na boso awe ku siguramente boso lo peresé. Boso lo no prolongá boso dianan na e tera ku boso ta krusa Jordan pa drenta i poderá di djé. "Mi ta yama shelu i tera komo testigu kontra boso awe, ku mi a pone bida i morto boso dilanti, e bendishon i e maldishon. Pesei, skohe bida pa bo biba, abo i bo desendientenan. DEU 30:15-19

 

Hopi di nos tin dudanan i difikuldat pa skohe hasta den nos bida sekular (personal). Duda i preguntanan, unda mi bai biba, kiko mi paga promé, kua trabow mi tuma, ku ken mi kasa, kiko mi kome awe, kua auto mi kumpra, kua paña mi bisti…etc..etc… Hopi hende tin problema pa tuma desishon, Tin momento maske kon sabi, maske kon inteligente bo ta....tog bo por hañabo ku difikultad pa tuma desishon. Dios tin un propositó pa nos kada unu i hopi biaha nos no sa ki pa hasi of kon pa kana. E palabra ta mustranos klaramente den Deuteronomio 30:15-19 loke Dios ta pone pa nos. Ta keda na nos kiko nos ta skohe. Sea e ta pa bendishon òf pa maldishon. Dios su palabra ta papia kla kon nos tin ku biba i kon nos tin ku kana. Nos mester djis obedesé.

Wel awe mi ke djis dunabo un par di tip pa bo tene kuenta kun’é ora bo hañabo tin ku tuma desishon....

  1. Hasi orashon promé
  2. Analisá e asuntu pa evita risiko (wak e ventaga i e desventaganan)
  3. Buska konsehó (bo por siña for di ekspereshanan di otro) (wak bon si no ta tur konseho ta bon, wak kua konseho ta bon)
  4. Si bo posibel desishon ta afektá of involukrá bo famia of kasá of yunan, korda papié ku nan i laga nan opinion tambe konta.

Ruman, Dios a duna nos kada un un “vrije wil”, dus “libertad pa disidí”.
Dor di pika (desobedensia na Dios i Su Palabra) nos no meresé e reino di Dios.
Nos ta bai perdi. Pero Dios a habri un kaminda i e kaminda ei ta e kaminda di Cristu Jesus. Pero Dios a laga esei den kada hende su man pa nan disidí ni nan e aseptá e kaminda aki of no.

Orashon: Señor Dios, Bo a pone mi dilanti bida i prosperidat, morto i atversidat, dor ku Bo ta ordenámi awe pa stima Abo SEÑOR. Yudami kana den Bo kamindanan i pa warda Bo mandamentunan, Bo statutonan i Bo huisionan, pa mi biba i multipliká, i pa Bo SEÑOR mi Dios bendishonámi na e tera ku mi ta bai drenta pa poderá di djé. Yudami i mustrami si mi kurason desviá i mi no ta obedesé, ma ta wòrdu halá for di e kaminda i ta adorá otro diosnan i ta sirbi nan, pa mi por bira bèk i siguibo mi Señor.

 Pa bo medita riba dj'é: DEUTERONOMIO 28:1-14