Tabatín un historia ta relatá ku un hóben a bai serka Socrates pa wòrdu intruí kon pa papia i kon pa papia den públiko. Ora ku nan a presentá e hóben aki na e gran filósofo aki, e hóben a kuminsa papia sin stop. Socrates no por a bisa ningun palabra. Finalmente e hóben aki a keda ketu, poniendo su man riba su boka. Socrates abisé: “Hoben, mi tin ku kobrabo dòbel pa mi siña bo. E hòben a bisa: “dòbel? pakiko?” Socrates a respondé: Si, pasombra pa hasibo un bon lider, mi tin ku siña bo dos kos. E promé ta: Bo tin ku siña kon kontrolá bo lenga i e ora ei bo por siña huselé korektamente.

Un bon lider, un bon amigu òf un bon esposo i un bon esposa ta semper un bon skuchadó. Asina nan a wòrdu siñá. Lamentabelmente, un di e rasonnan ku nos no ta skucha ta pasobra nos bokanan ta tur ora habrí!

Bo no a yega di puntra bo mes pakiko Dios a duna nos dos orea i un boka? E kier pa e hende skucha mas di loke e ta papia. Santiago 1:19 ta bisa: “Komprendé esaki, mi rumannan stimá. Tur hende mester ta lihé pa tende, no lihé pa papia, i no lihé pa rabia”.
Si nos sigi e dos promé partinan di e versikulo aki, automatikamente nos lo kumpli ku e di tres.

Estudionan ku a wòrdu hasí ta demostra ku tin 4 tipo basikó di skuchadó:

1. E skuchadó husgadó
E persona aki tin su mente preforma i e no kier wòrdu konfundí ku e echonan. Kiermen e ta skucha i e ta husga sin tene kuenta ku kiko a pasa di bèrdat. E ta kritiko i negativo. 17% di e poblashon ta kai den e kategoria aki.

2. E skuchado interogativo
E persona aki ta kere dor di puntra hopi, e ta un bon skuchadó. Preguntanan ku kisas ta importante ta para bira irelevante. 26% di e poblashon ta kai den e kategoria aki.

3. Skuchadó konsehadó
Hopi hende ta kai den e kategoria aki. (35%) Nan ta skucha solamente un parti i hasi un evaluashon i ta kla pa duna konseho sin a wòrdu puntra pa hasi esaki. E problema di e personanan aki ta, nan ta okupa nan mes pensando ki konseho nan duna. Realmente nan no ta skuchando bon i nan no ta skuchando tur loke bo ta bisando nan.

4. E skuchadó enfátiko
22% di e poblashon ta kai bou di e kategoria aki. Esaki ta e tipo di skuchadó ku pa hopi hende ta esun mas efektivo. Bo ta skucha pa kapta e sentimentu di e persona, i no solamente e kontenido di e palabranan, sino bo ta pone atenshon riba su tono di bos, e ekspreshon ku e ta hasi ku su kara i e lenguahe di kurpa. (esaki kiermen kon e ta move su mannan etc.)

Trata di skucha mas e siman aki i lo bo siña di ta un mihó amigo, un mihó amiga i un mihó esposa òf esposo.