Versikuló: 2 Timoteo 1:8-9

8 Pesei no tene bèrguensa di e testimonio di nos Señor, ni di mi, Su prezo; ma uni huntu ku mi den sufrimentu pa e evangelio según e poder di Dios, 9 Kende a salba nos i a yama nos ku un yamada santu, no konforme nos obranan, ma konforme Su mes propósito i grasia ku a wòrdu duná na nos den Kristu-Hesus for di tur eternidat,

Introdukshon: Nos kada unu di nos a haña un yamada. Nos no ta akinan djis pa tei òf djis pasombra nos tin kara bunita òf djis pasombra nos tin talento òf djis pasombra nos ta hasi bon. Nos a wòrdu yamá ku un proposito i esei ta di sirbi Dios. E yamada no ta kuminsa na asepta Kristu, sino for di kreashon di mundu ela traha nos ku un propósito di di alabé i adoré i tambe for di barika di nos mama, Dios a apartá nos pa su proposito. E palabra di Dios ta bisa den Isaias 49:1b Señor a yama mi for di promé ku mi a nase; for di tempu ku mi tabata den barika di mi mama El a menshoná Mi nòmber.

E yamada ta keda riba nos bidanan te ku ora nos asepta Kristu. Revelashon 3:20 ta bisa: Ata, Mi ta para na porta i ta bati; su un hende tende Mi bos i habri porta, lo Mi drenta serka djé, i lo sena kuné i é ku Mi. Esaki kiermen ku Dios ta para bati na porta di bo kurason i e kier tin un komunion ku bo i si bo habri e porta di bo kurason, E lo drenta i tin komunion ku bo.

Metodonan ku Dios ta usa pa yama hende ta lo sigiente:

1. Dor di Spiritu Santu

1 Tesalonisensenan 1:5 pasombra nos evangelio no a yega serka boso den palabra so, sino tambe den poder i den Spiritu Santu i ku plena konvikshon; meskos ku boso sa ki sorto di hende nos tabata meimei di boso pa boso kousa.

E evangelio di Señor Kristu-Hesus no a wòrdu prediká pa medio di palabra so, sino pa medio di poder di Spiritu Santu, milagernan i sanidat Tin persona a djis skucha e palabra i nan a bini na Kristu. Tin ku a bini na Kristu dor ku nan tabata malu i nan a risibi sanidat, otro pasombra Dios a hasi milager den nan bida.

2. Pa medio di su grasia

Galationan 1:15 Ma ora ku a agradá Dios, kende a apartá for di den barika di mi mama i yamami pa medio di Su grasia.

No pa nos obranan. Efesionan 2:8-9 ta bisa: Pasombra pa medio di grasia boso a wòrdu salbá dor di fe, i esei no di boso mes; e ta e don di Dios; no komo resultado di obranan, pa ni un hende no gaba. Hende ta malu. Kuantu di nos sa ku nos ta gusta defende i hustifika? Danki na Señor ku ta pa grasia hende ta salbá.

3. Pa medio di mensahe di e evangelio

2 Tesalonisensenan 2:14 ta bisa: I ta pa esaki El a yama boso pa medio di nos evangelio, pa boso haña e gloria di nos Señor Jesu-Cristo.