1. Nos mester stima nos enemigunan. Mateo 5:38-48
2. Nos no mester husga otro. Mateo7:1-6
3. Nos no mester sinti nos mas ku otro. Mateo 18:1-5
4. Nos no mester ta piedra di tropieso pa otro. Mateo 18:6-9
5. Nos mester pordona. Mateo 18:15-21

1. Nos mester stima nos enemigunan Mateo 5:38-48
E versikulo aki ta mustra nos e amor ku nos mester tin pa nos enemigunan. Kòrda ku Beibel ta bisa den Efesionan 6:12 ku nos no tin lucha kontra karni i sanger, sino kontra e gobernantenan, kontra e podernan, kontra e forsanan mundial di e skuridat aki, kontra e forsanan spiritual di maldat den e lugánan selestial. Nos no mester reakshona ku odio kontra di esun ku a hasi malu kontra nos, sino mas bien mustra e amor di Dios na nan.

Pregunta: kon nos por hasi bon na esnan ku a hasi nos malu?

Kisas tin di mi rumannan por a wak e video “Something to sing about”? Kon ora e hòmber bieu a insulta e mucha hòmber? Kon e reakshon tabata i kon e la drecha e situashon? Kiko abo lo hasi ora un hende insultabo?

Versikulo pa wak: Lukas 23:34 Hechos 7:60 1 Samuel 24:1-8 1 Samuel 26:3-11

2. Nos no mester husga otro Mateo7:1-6
Dios ta kondena e mal kustumber ku nos tin di kritika i husga otro, mientras ku nos mes tin hopi kosnan pa drecha. Nos no mester kritika un persona anto sin hasi orashon pe pa e por arepentí i bini na Kristu òf lanta para i sigi dilanti. Si un ruman kai den pika, nos ta kla pa bisa “Si, mi tabata sa, masha tempu mi ta mira e kos ei bini. etc. etc.” Nos mester sinti pa e ruman ei i hasi orashon na Dios, pa e lanta bek.

Pregunta: kon nos reakshon mester ta si bo a haña sa ku un ruman a kai den pika?

3. Nos no mester sinti nos mas ku otro Mateo 18:1-5
Esun ku umiyá su mes, no esun ku pechu haltu, ami ta kanta, ami ta predika, ami ta pastor, ami tin un bon trabou etc etc. sino esun ku ta “sirbi” ku integridat di su kurason. Kisas esun ku nos ta kere ta nada, e ta bari iglesia, bai kaya, limpia tur kos den iglesia, laga iglesia limpi pa ora sirbishi kaba etc. si e hasié di kurason i pa e obra di Dios e ta mas ku esun ku ta predika òf kanta ku pechu haltu. Tur loke nos ta hasi ta pa Señor i no pa hende. Kon nos por sinti nos mes mas ku otro si Kristu a muri i paga e mes un preis pa nos tur. A wòrdu duna donnan i trabounan na kada unu pa e “goede gang van zaken”. Imaginabo ku no tabatin controleur den trein, of no tabatin polis? Kon e mundu lo tabata? Pesei tambe Dios a pone hendenan, no pasombra esun ta mas miho ku otro, sino esun ku ta sirbi Señor i duna mas di su bida na Señor. Esun ku ta stima Señor i ta sirbié di integridat di kurason. Dios ta wak bo kurason i e amor ku bo tin pa su obra i kuantu tempu lo bo kier sakrifika p’É. Dios no por duna nos algu si nos no sa kon handle kuné.

4. Nos no mester ta piedra di tropieso pa otro Mateo 18:6-9
Kualke hende ku destruí un hende spiritualmente, lo haña e rabia di Dios riba dje. Si bo hasi algu ku ta pone bo ruman trompeka, esei ta hopi peligroso. Si bo a papia malu di un ruman i dor di esaki e ruman a laga Señor, kwidou òf si bo bisa bo ruman algu i dor di esaki amargura a forma, sin ku bo a drecha e kos, òf dor di bo e ruman no ta bini iglesia mas, kwidou pasombra e rabia di Dios ta bin riba bo. Bo sa ku si nos mes hasi algu, sea komete un pika of hasi algu, esaki por afekta e rumanan rondó di nos? Bo sa ku hasta ora bo falta bo sirbishinan, esei ta afekta e kurpa di Kristu? Nos tin ku komprondé ku ora nos bini na Kristu, nos tin un famia nobo, e famia di Dios i loke nos hasi por afekta e famia di Dios.